Non está decidido o como e o cando, máis resulta evidente que o Consello Internacional para a Exploración do Mar (ICES) non desbota a posibilidade de ampliar o número dos ecosistemas mariños vulnerábeis (EMV) en augas comunitarias. De calquera xeito, este órgano asesor da Comisión de Pesca da UE vén de retirar da súa “web” a actualización dun informe sobre eses ecosistemas debido a “erros” advertidos no informe, que poderían ser corrixidos de cara a permitir “máis controis nos datos”.
Neste último informe, os científicos do ICES elevan o número dos ecosistemas (EMV) existentes ou posíbeis situados entre os 400 e os 800 metros de profundidade en augas da Unión Europea, pasando do peche a toda a pesca de fondo en 87 áreas de Gran Sol, Golfo de Biscaia e Costas Ibéricas a 115 ou 125 , o que significaría un incremento do 20% nos quilómetros cadrados de extensión. De ser así, pasaríase dos 9.752 quilómetros cadrados da recomendación do ano 2022 a os 12.380 quilómetros cadrados que se barallan actualmente. No escenario máis restritivo, limítase o incremento entre os 14.885 e os 15.515 quilómetros cadrados, un 4,2% máis.
No Mar Céltico (sur de Irlanda) o número total de polígonos de EMV dentro da zona de 400-800 metros de fondo, a nova recomendación variaría entre os 57 e os 62, e a extensión superficial flutuaría entre 4.559 e 5.896 quilómetros cadrados, segundo os diferentes escenarios.
No ano 2023, a superficie de fondos con EMV oscilaba entre os 3.895 e os 5.587 quilómetros cadrados. No que atinxe ao Golfo de Biscaia e á Costa Ibérica, o novo informe contempla entre 51 e 64 polígonos con ecosistemas mariños vulnerábeis e unha extensión mínima de 7.821 quilómetros cadrados, cunha máxima de 9.619. No informe do ano pasado, o total de extensión en área situábase entre os 5.857 e os 9.371 quilómetros cadrados. A intensidade da pesca e a aparición de EMV, apunta o informe do ICES, só ten en conta os datos do arrastre de fondo, deixando o palangre de fondo a unha banda, por ser o principal segmento afectado polos peches de 2022 e cuxa inclusión motivara o recurso xudicial interposto pola frota e o Goberno de España, aínda pendente de sentenza.
O ICES non contempla nos escenarios desta resolución a pesca con artes estáticas que “teñen un impacto menor nos hábitats das EMV en comparanza coas artes móbiles de fondo”.
Os trocos baséanse en “probas novas ou actualizadas da presenza de EMV así como na intensidade da pesca con artes móbiles de contacto co fondo, o que resulta nun cambio no risco de impactos adversos significativos adicionais aos EMV cando cadran coa actividade pesqueira”, explica o ICES, que engade que esta nova avaliación “respalda o esforzo continuo para xestionar e protexer de xeito efectivo os entornos de augas profundas”.
No Mar Céltico, a principal novidade da recomendación é a eliminación dun grande polígono de EMV no Banco Porcupine debido a un aumento na actividade pesqueira.
Moi pendentes do resultado deste informe están, en Galicia, as organizacións de armadores dos portos de Vigo, Marín, Ribeira e Burela, e as de Euskadi.
