O Centro Tecnolóxico JEALSA, en Boiro, acolleu este 18 de setembro a presentación da IV Andaina Solidaria que leva o nome da conserveira. Participaron na cita cos medios Carlos Pérez, bioinformático do Grupo de Hematoloxía Computacional e Xenómica do Instituto da Investigación de Santiago, en representación da Fundación Stop Leucemia; Marcos Fajardo, concelleiro de Deportes; Margarita Hermo, directora de Relacións Institucionais de JEALSA, e José Ramón Romero, alcalde de Boiro. Tamén participaron Manolo Gómez e Lito Triñanes, en representación das entidades colaboradoras. O evento deportivo-solidario celebrarase o 29 de setembro, con saída dende a praza de Galicia de Boiro. As inscricións da andaina, cuxa recadación irá dar a Stop Leucemia (para investigar na loita contra esta doenza poñendo o foco nos novos avances tecnolóxicos), xa están abertas e poden facerse a través de Emesports.es. O percorrido será de dez quilómetros e, segundo fixeron saber na presentación, presentarase como un percorrido accesíbel e doado de camiñar.
