O Concello de Ribeira, cumprindo co compromiso na mellora, remodelación e acondicionamento dos parques infantís, fixo realidade (en tempo e prazo) a apertura do parque infantil das Avesadas tras unha reforma que incluíu a estrea dunha cuberta téxtil. Foi, segundo sinalou o alcalde Luís Pérez Barral, “unha acción moi demandada pola veciñanza que permitirá gozar do parque durante todo o ano sen limitacións de uso polas choivas”.
Engadiu que dende un punto de vista construtivo recorreuse a un sistema estrutural dun arco e dúas liñas de piares opostos sobre os que se tensa a cuberta téxtil. Explicou tamén que o proxecto cumpre o Código Técnico da Edificación, satisfacendo as esixencias básicas para cada un dos requisitos básicos de seguridade e accesibilidade.
Fontes do Concello de Ribeira informaron tamén de que a finais de mes procederase a poñer uns puntos de luz no interior do parque e, tamén, a brigada de obras realizará tarefas básicas de mantemento nalgúns elementos como a varanda perimetral.
Esta actuación supuxo un investimento de 97.066,67 euros e forma parte do Plan Provincial de Obras e Servizos POS+ 2023. A empresa encargada de realizar a obra foi Nature Infraestruturas e Servizos, S.L.
O alcalde informou que se están a investir 672.000€ a ese Plan de Mellora de Parques Infantís cos que se actuou nos parques de Banda ó Río, Avesadas, Artes, Carreira e comezará este mes a obra no parque da Horta do Cura de Palmeira. O rexedor engadiu que se van seguir mellorando as áreas de lecer para a rapazada de maneira progresiva e sobre todo aquelas que se atopan máis deterioradas.
