É unha das accións dos 12 Bens de Interese Cultural nos que se actúa no marco do Plan Xacobeo Next Generation posto en marcha polo Goberno autonómico
A Xunta de Galicia vén de abrir o proceso de licitación do contrato para rehabilitar o conxunto monumental Torres de Oeste no Concello de Catoira por 300.000€. A actuación enmárcanse no Plan Xacobeo Next Generation posto en marcha por Turismo de Galicia con fondos europeos para a rehabilitación e mellora de 12 Bens de Interese Cultural de titularidade pública vencellados ao Camiño de Santiago.
A intervención prevé a rehabilitación da capela con traballos de retellado da cuberta, restauración da imaxinería do Apóstolo Santiago así como colocación de novas portas e cableado, entre outras. Tamén se instalará unha caseta informativa que substituirá a existente, rehabilitarase a pérgola metálica de acceso, da pasarela de madeira, reformarase a zona de colectores de lixo mellorando a súa estética e finalmente desbrozarase e mellorarase a iluminación existente.
Plan Xacobeo Next Generation
Esta acción enmárcase nos distintos proxectos que a Xunta de Galicia está facendo realidade cos fondos europeos que foron asignados á Comunidade galega co Plan de Recuperación, Transformación e Resiliencia da Unión Europea. En concreto, forma parte do Plan Xacobeo Next Generation, que inclúe a posta en marcha de distintas liñas de axuda, a sinalización da rede cicloturística Eurovelo ou a rehabilitación de 12 BIC do Camiño de Santiago.
