Manuel María, o poeta da Terra Chá, morreu o 8 de setembro do ano 2024. Desde entón, cada ano, Xermolos de Guitiriz e a Irmandade Manuel María, o 8 de setembro, celebran a Memoria da Chaira Enteira, á que este ano corresponde a XX edición.
O centro de celebración é a terra natal de O Manuel, Outeiro de Rei, e comezará ás 14,30 cun xantar de irmandade no Restaurante Río Ladra. Seguiralle (17,00 h.) un recital de poemas de Manuel María no simbólico lugar de As Penas de Rodas, tan querido polo autor de Terra Chá, o libro que conforma a infraestrutura cultural básica desta unidade xeográfica e humana que ocupa o centro da provincia de Lugo.
Ás 18,00, prego no cemiterio de Outeiro de Rei diante da tumba do poeta, con lectura de anacos da súa obra polos amigos e devotos presentes. Culminarán os actos ás 19,00, na Campa de Santa Sabela, coa entrega de A Navalla do Manuel.
As navallas de Manuel María
O Manuel tiña querencia polas navallas como símbolo utilitario de irmandade, usada para partir o pan na mesa familiar e de amizade. Xermolos e a Irmandade Manuel María crearon o premio A Navalla do Manuel que cada ano se entrega a unha persoa destacada no mundo da cultura, con vencello con Manuel María, e con vocación cultural e social. E tamén cada ano entrega unha medalla a título póstumo a unha persoa que durante a súa vida se distinguiu na defensa dos mesmos valores.
A Navalla do Manuel a un persoeiro da cultura, cos valores que defendía o Manuel, vaise entregar a Luís Fernández Guitián, músico, mestre e escritor, que ostenta a Alcaldía do concello de Sober (Lugo). E a entregada a título póstumo corresponde a María Xosé Neira Maseda, activista sociocultural.
Despois da entrega das navallas, partirase o pan e o queixo a compartir, que serán acompañados por viño da Ribeira Sacra.
Para anotarse ao xantar, hai que chamar ao tfno. 646413890.
