A compañía Galitoon vai representar este mércores 28 de agosto un espectáculo para público infantil e familiar en Boiro. Trátase de Kori de Kokoriko. A cita será este mércores ás 12.00 horas na praia de Barraña.
O espectáculo é unha función de monicreques que nos pon na pel do Capitán Tang e dona Evarista, que son testemuñas da aterraxe na Terra dun extraterrestre do planeta Kokorico. A peza cóntanos o que pasaría se quixese coñecer os nosos costumes, malia non saber nin sequera cruzar a rúa dunha forma segura ou distinguir o significado da cor vermella, verde e amarelo… .O Capitán Tang e a dona Evarista terán que explicarlle a Kori como poder desenvolverse e aprender o fundamental de educación viaria para poder ir a salvo pola cidade dunha forma segura e eficiente.
