A patronal boirense (ABE) acadou un “éxito total” na festa final do verán do comercio local, celebrada esta pasada fin de semana, que compaxinou a liquidación dos stocks dos comercios cun amplo cartel de actividades de todo tipo.
Miles de clientes e visitantes acudiron a esta cita que, segundo sinalou a patronal, “sen dúbida veu para quedar”, e que comezou coa iniciativa Stocks Fóra Boa na que os negocios asociados á ABE ofreceron miles de produtos a prezos de liquidación durante toda a fin de semana.
Sorteo de 1.000€
Coas compras da fin de semana os clientes podían conseguir rifas para un sorteo presencial de 1.000€. Foron case 3.000 participacións as que se trocaron para o sorteo e a agraciada foi María Dolores Miguens, veciña de Boiro que recibiu os 1000€ en bonos ABE que poderá utilizar, sen caducidade, nos 207 negocios asociados á patronal boirense.
Festa infantil
En relación as actividades paralelas a ABE destacou “a multitude de nenas e nenos que acudiron a divertirse nos inchábeis, o toro mecánico e a festa da escuma que tiveron lugar na praza do Concello”.
A fin de festa celebrouse no parque da Cachada e correu a cargo da banda tributo ao grupo El Último de la Fila e finalizou cun espectáculo pirotécnico.
A valoración do presidente da ABE foi “altamente positiva xa que con esta iniciativa conseguimos atraer a Boiro a numeroso público que consumiu na localidade tanto nos comercios coma nos locais de hostalería que era o obxectivo da campaña”.
