O Pazo de Goiáns, en Boiro, vai acoller este domingo 28 de xullo un concerto dos prestixiosos músicos internacionais Cara Elise Colón e Emilio Colón, coa dirección artística de Carolina Landriscini.
O concerto Música para la Humanidad celebrarase a partir das 20.00 horas.
Cara Elise Colón é unha recoñecida pedagoga que ten colaborado como artista de cámara ao redor do mundo con concertos en Europa, Asia, Sur e Norte América. Recentes colaboracións inclúen a Asociación de Artes Escénicas de Perak (PSPA) para a súa xira en Malaisia, o Ciclo de Cámara da Orquestra Sinfónica de Pittsburgh, a serie do Ware Center en Pennsylvania, o Festival de Música de Mammoth Lakes, L’Hermitage Series en Los Ángeles e a Fundación Musical en Ponce. É co-fundadora da International Chamber Orchestra of Porto Rico.
Pola súa banda, Emilio Colón é un apaixonado e virtuoso músico e pedagogo, Durante a súa carreira presentouse nos Estados Unidos, Canadá, América Latina, Europa e Asia. Os seus traballos máis recoñecidos como solista inclúen a súa participación coa Orquestra Sinfónica Nacional de Ucraína, a Orquestra Sinfónica de Istambul, a Orquestra de Cámara de Reno, a Orquestra Sinfónica de Porto Rico, a Orquestra Sinfónica Estatal de İzmir, a Orquestra Sinfónica de Guayaquil, Bozeman Symphony, a Orquestra Filharmónica de Boca del Río, en México, a Texas Festival Orchestra e a Orquestra Sinfónica de Santo Ángelo. Ademais foi membro do xurado do Pablo Casals International Violoncelo Competition en Budapest, Hungría.
