A nova edición do festival Mar aberto, concertos na fin da terra, organizado por Turismo de Galicia como proposta turística do verán en lugares patrimoniais, arrinca este venres 26 no Faro de Corrubedo, en Ribeira, a cargo de Ute Lemper, Marem Ladson e Señora DJ. O sábado será a quenda de Céu, Brais Morán & Nasaufunk e Rapariga DJ.
O programa do festival Mar Aberto, concertos na fin da terra, inclúe dous concertos no Faro de Corrubedo, outros dous no Faro Punta da Barca de Muxía e finalmente, outros dous no Castelo de San Felipe en Ferrol. As citas serán o 26 e 27 de xullo, en Ribeira, o 2 e 3 de agosto en Muxía e o 9 e 10 de agosto en Ferrol. Podemos ver toda a información sobre estas actuacións na web do festival.
Logo da cita en Corrubedo, a seguinte cita será no Faro Punta da Barca de Muxía os días 2 e 3 coa música de Mercedes Peón, Budiño, Mondra e Zeltia Irevire, para rematar no Castelo de San Felipe, en Ferrol o 9 e 10 de agosto coas actuacións de María José LLergo, _juno, Pamela Rodríguez e Lua de Santana.
Tal e como se nos lembra na dita web, Mar Aberto é unha experiencia máxica que terá como escenario algún dos recunchos máis bonitos e impresionantes da costa galega; un ciclo de concertos íntimos con capacidade moi limitada e unhas propostas artísticas deseñadas para cada espazo que nos permitirán gozar de actuacións únicas e irrepetibles; unha fusión perfecta entre patrimonio, paisaxe, cultura, gastronomía e música, unha experiencia inesquecible para os cinco sentidos.
