A Xunta de Galicia a través da Dirección Xeral de Comercio vén de resolver a concesión da orde de axudas CO300C para a transformación dixital, innovación e modernización do sector comercial e artesanal galego.
Esa orde ten como beneficiarios aos comercios retallistas e financia tres liñas de actuación diferentes: dixitalización, innovación e modernización comercial.
Recibidas as notificacións de concesión, a ABE acadou “un pleno”, sinalou a patronal, engadindo que “as 7 solicitudes realizadas a outros tantos comercios acadaron a axuda solicitada, en total serán mais de 35.000€ os que recibirán os beneficiarios cun investimento total superior aos 80.000€”.
As axudas servirán, entre outras cousas, para a implantación de webs de venda online, mellora das ferramentas de posicionamento , xestión de redes sociais ou mellora da imaxe dixital e a loxística comercial.
Tamén se levarán a cabo procesos de modernización comercial como a instalación de sistemas de iluminación eficientes, sistemas de climatización así como diferentes reformas nos establecementos todas elas encamiñadas a mellorar a imaxe dos negocios.
Destacar que a ABE é unha das poucas asociacións a nivel nacional que realiza todo o proceso de tramitación de axudas e subvencións para os seus socios dende a información inicial ata a solicitude, control e xustificación do expediente.
