Unha veciña da Estrada foi detida acusada dun delito de estafa por subtraer electrodomésticos por un valor de 5.000 euros nunha tenda de Boiro, tras simular unha transferencia co seu móbil.
Segundo informou a Garda Civil, a investigación, denominada Vacamar, comezou despois de que o propietario do establecemento denunciase os feitos. O dono explicou que a detida realizara unha compra de electrodomésticos valorada en 5.000 euros e que ese día retirou dous Smart TV e unha aspiradora, valorados en 1.093 euros, ademais de 35 euros en efectivo, tras simular realizar unha transferencia bancaria co seu móbil ao número de conta proporcionado.
Durante a investigación, os axentes do Milladoiro lograron localizar e recuperar os electrodomésticos e o efectivo estafados.
A Garda Civil procedeu á detención da muller como presunta autora dun delito de estafa e restituíu os bens incautados ao seu lexítimo propietario.
