Boiro recupera este verán, despois de oito anos, a súa tradicional exaltación do mexillón. Será a XVI edición e terá lugar os días 16, 17 e 18 de agosto. Segundo informou o Concello, o evento conta co apoio das seis agrupacións de mexilloeiros máis numerosas do municipio (ASMECruz, A Marxa, AMEbarraña, Virxe do Carme, OPMEGAL e A Boirense), ademais do Concello de Boiro e Consellería do mar.
O principal obxectivo desta cita é “potenciar o mexillón das rías galegas, buscando levar máis lonxe un produto moi habitual na dieta dos galegos e galegas, sumado ao alto número de postos de traballo directos e indirectos que xera na comunidade autónoma”.
A organización irá desvelando a programación nas vindeiras semanas mediante as redes sociais do propio evento, pero contará con actividades para todos os públicos. A xornada do día 16 transcorrerá no centro urbano de Boiro e os días 17 e 18 será na carpa situada no peirao de Cabo de Cruz.
