A Semana Galega da Vela non podería empezar mellor na Ría de Arousa, cunhas condicións inmellorables para a navegación, mandando o vento do norte cunha intensidade media de 10 nós.
Esta compoñente permitiu empezar en hora, coa Oficial Principal da regata, Loli Camba, iniciando a primeira das probas ás tres da tarde, cumprindo o programa completo desta primeira xornada que eran dúas mangas para as dúas primeira modalidades convocadas para o venres na auga: Optimist, con 100 nenas e nenos; e ILCA 4, a máis xuvenil do Láser, cunha quincena de regatistas navegando, algúns deles e elas, a súa primeira proba tras o paso pola vela infantil do Optimist.
Precisamente nesta Clase domina a Semana Galega da Vela o membro do equipo de regatas do Real Club Náutico de Vigo, Alejandro Alonso, con 6 puntos, froito dun cuarto e un segundo parciais. Alonso tamén é titular da categoría Sub13, o que aínda lle achega máis mérito ao novo regatista. Séguelle no podio provisional o coruñés Federico Pardo, tamén Sub13, do Real Club Náutico da cidade herculina, con 10 puntos. E é bronce Daniel Iglesias, do Club Náutico e Deportivo de Riveira, con dous puntos máis que o segundo. A primeira clasificada en categoría feminina é Carmen Bermejo, quinta na xeral, tamén do Real Club Náutico da Coruña.
En ILCA 4 gran día para a representante do Real Club Náutico Sanxenxo, Lucía Vaquerizo, que lidera a proba con dúas mangas nas que fixo unha prata e un ouro, con 3 puntos. Cun máis, na segunda praza, atópase Pedro Núñez, do Real Club Náutico da Coruña. E o terceiro banzo provisional do podio é para cangués do Real Club Náutico da localidade do Morrazo, Jorge Costas, con 8 puntos.
O sábado arrinca o resto de modalidades, sumándose ao ILCA 4 e ao Optimist os 420, Fórmula Wind Foil, ILCA 6, Vaurien e un dos pratos fortes desta semana Galega da Vela, o Campionato Ibérico de Radiocontrol.
