É unha pregunta/afirmación inocente a do titular. Por este motivo tento razonalas: a cidade da Coruña foi medrando, históricamente, dende que alguén tivo a ocorrencia de facer recheos que achicaron o espazo do bordo marítimo e ampliar o terrestre. O mesmo aconteceu en Vigo, en Cangas, Vilagarcía, Marín, Burela, Ribeira, Cariño, Malpica, Viveiro, Sada e un longo etcétera que sumarìan milleiros de metros cadrados gañados ao mar e que pasaron a seren dependentes das Autoridades Portuarias en determinados casos dependentes á súa vez do Estado ou das autonomías (como a inmensa maioría dos portos galegos).
Estes espazos gañados ao mar convertéronse nunha extensión que ampliaba a do propio concello chegando os habitantes destes a consideralos como propios do municipio cando, na realidade, estes milleiros de metros cadrados son propiedade de Portos do Estado ou, no que atinxe aos pertencentes á comunidade galega, a Portos de Galicia, organismo á súa vez integrado na estrutura da Xunta cuxo funcionamento pagamos dobremente os aquí residentes polas vías autonómica e estatal.
Dadas as espectativas xeradas polo cambio climático, moitos deses espazos gañados ao mar serán recuperados por este debido, sobre todo, ao desxeo. Imposible facer unha previsión sobre cando se van rexistrar estes cambios que os científicos prognostican dende vaui anos; mais o certo é que o que se agoira non é moi agradable e non significará beneficio algún para o territorio e os que habiten este. Sen embargo, os responsables portuarios tentan, xa, amorear proxectos que lles reporten beneficios -sobre todo económicos- cos que facer fronte a, por exemplo, gastos derivados dos intereses xerados por préstamos suscritos con Portos do Estado, Portos de Galicia ou distintas entidades bancarias. En calquera caso, diñeiro público que aportamos todos e cada un dos cidadáns deste país, primeiro para facer os recheos e levantar tinglados portuarios que o mar se vai levar cando as previsións científicas se cumpran e, segundo, para lle dar rendemento ao que quede. Pero mentras tanto son, como dicía, as autoridades portuarias, as que fan e desfán cun diñeiro público que sempre vai ser pagado polo cidadán que, en contadas ocasións, pode beneficiarse das devanditas instalacións, planifican e ordenan. Porque, directa ou indirectamente, todos pagamos a construción de peiraos, pantaláns,etc., para que os barcos paguen, á súa vez, polo atraque ou a descarga neles.
Que vai pasar cando o mar recupere, polo desxeo anunciado, o espazo perdido pola acción dos humanos?. Terán que pagar estes novamente por non facer uso do que xa pagaran anteriormente por non lle poñer portas ao mar?.
Como cantaba o finado Antonio Molina e pensando nos netos que están chamados a nos dar bisnetos e tataranetos (que moitos non coñeceremos, ben seguro) “o futuro é moi escuro”.
