O director xeral de Cultura, Anxo M. Lorenzo, asistiu hoxe ao primeiro encontro do proxecto Esas nubes que pasan, a iniciativa impulsada pola Xunta para poñer en valor o legado de Camilo José Cela. Trátase dun proxecto artístico que finalizará coa execución dun mural ao carón do museo de Iria Flavia.
O representante da Consellería de Cultura, Lingua e Xuventude salientou o obxectivo desta iniciativa como “unha proposta plural na que se teñen en conta diversas facetas da cultura para divulgar o legado dun dos autores máis importantes da literatura de Galicia”. Neste senso, destacou a singularidade deste proxecto “que busca a unión das diferentes perspectivas dos artistas que participan para a elaboración do mural”.
Para levar a cabo esta primeira fase da intervención artística foron elixidos diferentes axentes da cultura galega que percorreron o museo e as coleccións, para inspirarse na obra de Camilo José Cela. Comisariados pola xestora cultural, Paula Cabaleiro, fixeron esta visita, a empresa cooperativa dedicada ao muralismo Cestola na Cachola, o artista visual e escultor Román Corbato e a gañadora do Premio Nacional de Poesía en 2023 Yolanda Castaño, para elaborar, entre todos, unha sinerxía entre as diferentes facetas da cultura nas que cada persoa é experta.
A execución da actuación artística está prevista para a segunda quincena do mes de setembro. Ao remate do proxecto está previsto un acto de presentación ao público e unha xornada de encontro cos centros escolares locais, onde os artistas contarán á rapazada de Padrón como foi o proceso de creación, as técnicas utilizadas e a simboloxía da obra.
