O Concello de Boiro colabora coa Escola de Fútbol Municipal de Boiro na celebración do Depor Campus que organiza a Fundación Deportivo e se vai celebrar nas instalacións municipais de Valiño entre o 15 e o 19 de xullo.
Á presentación desta iniciativa de formación e dinamización deportiva, que tivo lugar no Consistorio e asistiron o concelleiro de Deportes, Marcos Fajardo; o directivo da EFM, Julio García; o coordinador da EFM, Carlos Ozores; e Alejandro Vidal e Sergio Maurente do Deportivo.
Segundo explicaron, a actividade está dirixida a rapaces e rapazas de 6 a 14 anos e vaise desenvolver en horario de 10.00 a 14.00 horas. “O Campus forma parte do convenio de colaboración que temos co RC Deportivo e que redunda no beneficio dos nosos rapaces e rapazas que pasan unha semana divertíndose a xogando ao fútbol”, afirmaron dende a EFM.
O obxectivo desta actividade é aprender e desenvolver a coordinación a través de xogos coordinativos; aprender habilidades e conceptos na relación co corpo e o balón; traballar fundamentos técnico-tácticos… á través de xogos e habilidade co balón, circuítos coordinativos, desafíos técnicos, partidos e competicións. “Boiro é unha das sedes máis antigas nas que se desenvolve este campus, que supón unha oportunidade para seguir medrando no eido deportivo”, recoñeceron dende o RC Deportivo.
O concelleiro de Deportes, Marcos Fajardo, animou aos rapaces e rapazas de Boiro e a comarca a que participen desta actividade que “desenvolve un equipo cunha gran traxectoria como é o Deportivo e que durante unha semana trae a súa experiencia para ensinar aos nosos rapaces e rapazas”. As inscricións están xa abertas e poden facerse a través da web deporcampus.rcdeportivo.es ata o 9 de xullo ás 14.00 horas. O prezo de inscrición é de 125 euros ou 105 para xogadores da EFM Boiro ou outros supostos.
