Esta fin de semana celébranse en Rianxo as Festas de San Antón do Pazo, que veñen da man da comisión veciñal dos festexos e que contan coa colaboración do Concello. Ofrecen unha manchea de actividades para residentes e visitantes de todas as idades.
A troula comeza este 7 de xuño cos foguetes que marcan o inicio da festa (ás 12h) e coas verbenas da Orquestra JB Son (ás 22.30) e Somoza Trio (ás 0.00). O encargado de rematar a xornada será DJ Pivitas.
Ao día seguinte actuará (cunha alborada) Vai de Roda ás 10.15 horas e ás 19.00 será a quenda da ruada con Os Galácticos. Pola noite, a partir das 23.30 horas, actuarán The Cuncas e Charleston Big Band.
O domingo abrirá cunha nova alborada a cargo de Vai de Roda e ás 12.45 comezarán os oficios de vertente máis relixiosa: primeiro o tradicional paseo do Santo Antón acompañado da charanga Vai de Roda e dos cabezudos e logo a misa campestre cantada por Felisa. Ao remate da misa haberá unha sesión vermú. Pola tarde a rapazada será protagonista coa celebración do Pazolandia, que inclúe inchábeis, xogos e outras actividades.
