O Concello de Boiro colabora coa Escola de Fútbol Municipal de Boiro na organización do XV Torneo de Fútbol Base – Abanqueiro SD, que se celebra os días 8, 9, 15 e 16 de xuño no Campo Municipal de Vista Alegre. Na presentación, desenvolvida na mañá deste martes 4 de xuño, participaron o concelleiro de Deportes, Marcos Fajardo; e Julio García e Yobanna Sieira, da directiva da EFM.
O torneo está dividido en catro categorías: biberón, prebenxamín, benxamin e alevín, no que van participar máis de 120 equipos de 60 clubs de toda Galicia. “Concorren as mellores canteiras de equipos das catro provincias para garantir que o nivel deportivo se manteña cada ano”, afirmou Julio García.
O sábado 8 xogarase a fase previa de benxamíns e alevíns, o domingo 9 a fase final de prebenxamin e biberón e os días 15 e 16 a fase final de benxamín e alevín.
“O ano pasado tivemos unha asistencia de mais de 4.000 persoas e estimamos que nesta ocasión sexa similar”, afirmou Julio.
O concelleiro de Deportes, Marcos Fajardo, agradeceu a implicación neste torneo “que se celebra dende fai mais de 15 anos e que supón unha importante labor social e deportiva” e animou aos rapaces e rapazas a que desfruten dos partidos e dunha xornada de deporte.
