A Asociación de Empresarios de Ribeira emitiu un novo comunicado en relación ao proxecto do novo polígono local no que reclama aos grupos políticos que aparquen diferencias e fagan fronte común para lograr definitivamente a consecución do novo complexo empresarial de Pedras Vermellas, de gran importancia, sinalan, para o desenvolvemento económico e social da contorna ribeirense e da comarca.
“Dende a Asociación de Empresarios”, sinala a patronal a través do seu presidente Francisco Martínez Gude, “asistimos ás constantes noticias que aparecen reflectidas nos diferentes medios de comunicación respecto á consecución do tan ansiado polígono industrial, e a posibilidade da execución dun macro polígono entre os concellos da Pobra e Ribeira, e con respecto a estas dúas noticias queremos manifestar que a nosa posición era, é e segue sendo, conseguir que dunha vez por todas comecen as obras do polígono promovido polo noso Concello e polo cal apostamos”. A asociación recalca que “aínda que non nos opoñemos a calquera outra iniciativa que redunde nun beneficio para o noso tecido industrial, si somos conscientes dos prazos que hai que cubrir para lograr algunha destas ansiadas obras; é por iso que unha vez concluída a fase de expropiación dos terreos, pedímoslle aos nosos políticos, unha vez máis, remen xuntos para quitar adiante esta obra do polígono tan necesaria para a nosa sociedade”.
A patronal lembra que se está a traballar neste intre na posibilidades de conseguir financiamento para levar a cabo diferentes conceptos de obra como poden ser acometida de luz, auga e rede de sumidoiros, así como para outros conceptos que
fagan que o custo de metro de solo non se dispare e se manteña (ou baixe) nos parámetros que manexamos ata o de agora. Seguimos mantendo reunións cos diferentes organismos, con conselleiros e directores xerais da Xunta de Galicia, así como coa Deputación, entidades nas que atopamos unha excelente acollida de cara a nosas demandas, sen esquecernos así mesmo da variante, que tanto urxe ao noso saturado tráfico, para que se axilice a entrada e saída do municipio”.
A asociación recorda tamén que “a finais do mes de xuño esperamos poder celebrar unha reunión cos nosos socios e empresarios interesados, que desexen asistir, para informarlles máis exhaustivamente de como van as cousas ata o de agora e cales son as etapas que nos quedan por cubrir”.
