A Consellería de Emprego, Comercio e Emigración vén de outorgar unha subvención ao Concello de Boiro por importe de 23.786,64 euros para a contratación temporal de persoas en risco de exclusión social. O dito importe da axuda vai encamiñado á contratación de dous peóns durante nove meses, sendo o obxectivo desta subvención a contratación temporal de persoas en situación de risco ou exclusión social perceptoras da Renda de Integración Social de Galicia (RISGA), coa finalidade de achegarlles experiencia e práctica profesional precisas para facilitar a súa inserción laboral.
Deste xeito, con esta subvención vaise realizar a contratación de dous peóns para levar a cabo traballos de revalorización de espazos públicos urbanos. O persoal contratado prestará asistencia ás brigadas municipais en tarefas de limpeza e acondicionamento de espazos públicos como parques e outras zonas de paseo e tránsito peonil.
Engadir que a selección do persoal vaise realizar mediante unha selección de persoas demandantes non ocupadas a través dunha oferta de emprego específica do programa de contratación de persoas beneficiarias de RISGA nas oficinas do Servizo Público de Emprego de Galicia.
