O Concello de Boiro inaugura este luns unha exposición sobre a riqueza do galego no marco do programa FalaRedes da Xunta de Galicia (Secretaría Xeral de Política Lingüística). Estamos a falar da mostra Orgullo da nosa lingua: o galego é un tesouro para compartir, que estará situada no mes de maio na rúa peonil de Boiro con posibilidade de visitas guiadas para os centros de ensino.
A iniciativa desenvólvese nos concellos pertencentes á Rede de Dinamización Lingüística e en Boiro estará entre o 6 e o 12 do mes. A mostra está composta por nove paneis que recollen as diversas peculiaridades do galego coa finalidade de poñer en valor a súa riqueza e convidar á cidadanía a falalo.
Haberá visitas guiadas para os centros de ensino o martes de 10.00 a 14.00 horas e de 16.00 a 20.00 horas; o mércores de 10.00 a 14.00 horas; o xoves de 16.00 a 20.00 horas; o venres de 10.00 a 14.00 horas e de 16.00 a 20.00 horas; e o sábado de 11.00 a 14.00 horas e de 16.00 a 19.00 horas.
Para as visitas guiadas é necesaria inscrición previa na Casa da Cultura de Boiro ou no teléfono 981 84 84 25.
