Un total de dezanove ofertas presentáronse para a actuación consistente na pavimentación e instalación de rede de pluviais na rúa da Cruz, na parroquia ribeirense de Aguiño.
Na actualidade o pavimento desta vía, que está feito de aglomerado asfáltico, atópase en mal estado, mentres que a rede de augas pluviais resulta deficitaria ao producirse con certa frecuencia atascos e inundacións na calzada.
Para poñer solución a estas eivas, técnicos do concello redactaron un proxecto que inclúe a instalación dunha nova tubaxe de pluviais de 315 milímetros de diámetro e 368 metros de longo no centro da calzada, con arquetas sumidoiro -28 en total- nos laterais, ademais de 10 pozos de rexistro cada 40 metros aproximadamente. Así mesmo, procederase á pavimentación cunha mestura bituminosa en quente nunha superficie de 2.146 metros cadrados.
O prazo de execución son dous meses e o importe da actuación ascende a 69.933’38 euros, IVE incluído, financiado no marco do POS+2018 da Deputación da Coruña.
