Logo do éxito da primeira experiencia formativa de tarefas agrícolas e hortícolas, na que participaron máis de dúas ducias de ribeirenses, o Concello de Ribeira vén de pór en marcha, a través dos seus Servizos Sociais Comunitarios, un segundo curso de poda de froiteiras de óso e pebidas que prosegue o ronsel do bo sabor de boca deixado polo obradoiro da semana pasada, que conseguiu completar o aforo.
Desta vez, o curso teórico-práctico celebrarase os días 7 e 9 de febreiro en horario de tarde. Será impartido novamente por Carme Freire e está dirixido a persoas pensionistas maiores de 55 anos. As inscricións pódense formalizar a partir do luns 3 de febreiro na Oficina de Atención Cidadá situado no andar baixo da Casa do Concello.
Esta segunda convocatoria do obradoiro veu motivada polo interese mostrado pola cidadanía para formarse en labores agrícolas con froiteiras, xa que coa edición dos días pasados non foi posíbel satisfacer tódalas solicitudes de inscrición cursadas.
