A Escola de Música de Porto do Son celebra este mes de maio un ciclo de xornadas de portas abertas para dar a coñecer a súa actividade, o seu equipo humano e as súas instalacións ante as familias e as rapazas e rapaces que queiran introducirse no apaixonante mundo da interpretación e a creación musical. As sesións, indicadas para crianzas de máis de 5 anos, serán de balde e celebraranse os días 13, 14 e 15 de maio no auditorio da Casa da Cultura de Porto do Son. Porase o foco na linguaxe musical, no coro e no piano.
