O deputado responsábel da Área de Patrimonio da Deputación, Xosé L. Penas, visitou este xoves 11 de abril o concello de Outes. Fíxoo acompañado da deputada provincial Soledad Agra e do alcalde, Manuel González López, para coñecer de primeira man os petróglifos que hai no termo municipal e valorar a súa posíbel inclusión no proxecto Parque Compostela Rupestre. O concelleiro de Cultura Anxo Núñez tamén participou na visita.
Segundo lembrou, este proxecto está liderado pola Deputación e une diferentes municipios da Terra de Santiago en torno ao seu patrimonio rupestre. Intégrase concretamente polos concellos de Ames, Brión, Santiago, Teo e Val do Dubra. “No caso de que se cumpran os pertinentes requisitos, Outes sumaríase tamén a esta iniciativa que pon en valor a riqueza arqueolóxica da comarca”, sinalou.
Penas valorou moi positivamente os petróglifos localizados en Fontemoureira, que “se axustan perfectamente a Compostela Rupestre xa que están en bo estado de conservación e limpeza”, apuntou, “e, ademais, teñen habilitados os accesos e incluso se están facendo roteiros dende o concello”. Xunto cos petróglifos, avaliarase tamén a adhesión dos esgliptógrifos da Carballa: “que conforman o patrimonio rupestre de Outes, e que complementará os dos 5 concellos xa adheridos”.
Para a adhesión de Outes ao Parque Compostela Rupestre, os próximos pasos son que o Concello solicite formalmente a súa inclusión e posteriormente levalo ao pleno de Compostela Rupestre para valoralo tanto política como tecnicamente.
