Este venres 1 de marzo inaugúrase en Ribeira, no Centro Cultural Lustres Rivas ás 20.30 horas, a exposición titulada EmpoderArte, organizada dende a área municipal de Cultura como homenaxe á artista Carmen Romero. Trátase dunha mostra colectiva na que participan máis dunha trintena de artistas e coa que o Concello de Ribeira quere celebrar celebramos non só os logros e contribucións das mulleres ao longo da historia, senón tamén a súa vitalidade e creatividade no eido artístico.
A mostra forma parte do programa Marzo de Igualdade do Concello, destinado a conmemorar o Día Internacional da Muller, este 8M. Inclúe máis dunha decena de accións no mes vindeiro que xirarán arredor da muller, da igualdade e do feminismo como valores transversais na sociedade e “que debemos promover tamén dende as administracións”, explicou na presentación da axenda Antía Alberte, engadindo que “con esta programación o que pretendemos é crear sinerxías entre as concellerías e fomentar dende este goberno unha cultura de carácter feminista”.
Ao día seguinte da inauguración, o sábado 2 de marzo ás 12.00h, tamén no Centro Cultural Lustres Rivas haberá contacontos para nenos e nenas de 3 a 12 anos e as súas familias da man de Atenea García. Para esta actividade será preciso realizar inscrición previa enviando un correo electrónico a normalizacion@ribeira.gal.
