O Concello de Boiro avanza a as obras para a mellora medioambiental do Estuario do Río Coroño, no tramo comprendido entre o Coído e o Pazo de Goiáns coa dotación dun paseo que conecte a finca e o inmóbel do Pazo co casco urbano. O alcalde, José Ramón Romero, visitou as obras para coñecer o seu estado de execución.
Segundo explicou, a actuación que se está a levar a cabo busca “dar continuidade ás actuacións de accesibilidade e mellora medioambiental que o Concello de Boiro desenvolve no esteiro”. Inclúen a execución dun paseo peonil accesíbel, duns 855 metros de lonxitude e de 2,5 metros de ancho, realizado con pavimento natural-eco para obter un percorrido sen barreiras e que respecte o medio ambiente.
Ademais, no núcleo rural do Coído, vaise realizar unha pequena zona de estacionamento co obxectivo de organizar os vehículos da veciñanza da zona e para liberar os rueiros. Neste núcleo vaise habilitar tamén un espazo de lecer con xogos para os nenos e nenas e ambientados na natureza e unha zona de xantar para as familias.
Na contorna do Pazo de Goiáns o proxecto contempla a realización dun percorrido respectando os camiños e anchos orixinais, así como as especies vexetais existentes. “Esta obra achega o Pazo ao núcleo urbano cun paseo peonil accesíbel que vai seguir poñendo en valor o histórico edificio, a súa finca e toda a contorna da desembocadura do río Coroño”, afirmou o alcalde.
