
A Casa da Cultura de Carreira acolleu onte unha xuntanza veciñal para coñecer as propostas da candidatura do PP ao Goberno central liderada por Alberto Núñez Feijóo e que se decidirá nas urnas o vindeiro 29N. O candidato á Cámara Baixa das Cortes Xerais pola provincia da Coruña, Manuel Ruiz, e a alcaldesa de Ribeira, María Sampedro, defenderon na súa intervención que “o goberno do Partido Popular é o cambio necesario para España”.
Ruiz cualificou de “nefasta” a xestión de Pedro Sánchez á fronte do Executivo estatal e puxo como exemplos “o acontecido nos dous accidentes ferroviarios e a actual crise migratoria que se vive en Ceuta”. Con relación a isto último, sinalou que “pretenden poñernos a etiqueta de racistas cando criticamos o que está sucedendo. Claro que queremos migración, pero co que non podemos concordar é coa maneira na que están actuando os socialistas nesta situación”.
O candidato tamén criticou a “falta de palabra, as mentiras de Pedro Sánchez cando rexeitaba de Podemos ou aseguraba que nunca pactaría con Bildu; e resulta que son socios de Goberno”, sentenciou.

Pola súa parte, María Sampedro dixo que “estamos ante un Partido Socialista con numerosos casos de corrupción, moitos deles arredor do propio presidente; un presidente que, ante a presión, escapa para descansar e non está á fronte para resolver. Demostran unha total incapacidade e desleixo; pero Alberto Núñez Feijóo si amosou sempre as súas aptitudes e xestión como durante a etapa que presidiu a Xunta de Galicia. Agora queremos ese liderado, ese bo facer, ese sentidiño, no goberno central e conseguirémolo na cita que temos coas urnas no 29N”.
A rexedora engadiu a isto que “este si que é o voto útil, este é o momento para que se escoiten as demandas de Galicia a nivel estatal. Non como fai o BNG, que moito presume de ser o altofalante e en todo este tempo non fixo absolutamente nada polos intereses dos galegos”.
Os populares salientaron diversas actuacións executadas no municipio, como a propia Casa da Cultura de Carreira, a cuberta do parque infantil ou o novo Auditorio municipal. “Son unhas infraestruturas moi importantes que o BNG quixo facer como propias durante o seu tempo na Alcaldía, pero as mentiras teñen as patas moi curtas. Foron os mandatos liderados polo PP os que incrementaron as prestacións en Ribeira, tamén en servizos básicos como o abastecemento. Se soubemos facer un bo traballo a nivel local, tede por seguro que se fará tamén a nivel estatal”, sentenciaron.
Os mitins continúan hoxe en Castiñeiras, no local parroquial; en Oleiros, no Centro Social, no xoves 19, ás 20.00 horas; en Aguiño, na Casa de Cultura, no venres 20, ás 19.00 horas; en Ribeira, na carpa da rúa Galicia, no domingo 22, ás 19.30 horas, e que contará coa participación do presidente da Xunta de Galicia, Alfonso Rueda; en Corrubedo, na Casa do Mar, no luns 23, ás 20.00 horas; en Palmeira, no bar Baluarte, no martes 24, ás 19.30 horas; en Olveira, no local da comunidade de montes, no mércores 25, ás 20.30 horas; e en Artes, no Centro Recreativo, no xoves 26, ás 20.00 horas.



