Manuel Gago, escritor, comunicador e profesor universitario da Pobra do Caramiñal, presentará este venres, 6 de novembro, o seu ensaio Ata que os mares sequen. Unha Escocia en clave galega, publicado por Morgante Edicións. O encontro terá lugar ás 20.30 horas na Biblioteca Victoriano García Martí da Pobra do Caramiñal.
Na presentación participarán, ademais do propio autor, Isabel Santos, vicepresidenta da Asociación Cultural Barbantia; Marco García Quintela, catedrático de Historia Antiga da Universidade de Santiago de Compostela; e José Carlos Vidal Suárez, alcalde da Pobra do Caramiñal.
O acto está organizado pola Asociación Cultural Barbantia, La Voz de Galicia, Morgante Edicións e o Concello da Pobra do Caramiñal, coa colaboración da Deputación da Coruña.
Esta cita literaria ofrecerá ao público a oportunidade de coñecer de primeira man a publicación e compartir un encontro co seu autor.
A actividade desenvolverase na Biblioteca Victoriano García Martí, situada na rúa Castelao, número 25, segundo andar. Desde a organización convídase a cidadanía a participar na presentación.
