
O Concello de Lousame abre este 18 de novembro o prazo de inscrición no Lousame Concilia, un programa para favorecer nas familias a harmonía entre tempo laboral e o de lecer durante as vacacións: un programa que o Concello convocou conxuntamente para os tres próximos períodos de vacacións escolares do período 2026-2027: Nadal, Entroido e Semana Santa.
O Concello de Lousame ofrece 20 prazas en cada convocatoria, mentres que as familias poderán optar por anotarse nun, dous ou nos tres períodos ofertados. As inscricións deberán formalizarse no Rexistro Xeral do Concello de Lousame antes do 27 de novembro.
Lousame Concilia é un servizo de canguraxe para nenos e nenas de 3 a 16 anos que se celebra nos días laborábeis dos períodos de vacacións escolares, en horario de 9:30 a 14:30 horas, nas instalacións do CPI Cernadas de Castro. O Concello de Lousame convoca 20 prazas para: Nadal (10 días: 22, 23, 24, 28, 29, 30 e 31 de decembro; e 4, 5 e 7 de xaneiro), Entroido (3 días: 8, 9 e 10 de febreiro de 2027) e Semana Santa (4 días: 22, 23, 24 e 29 de marzo).
Para anotarse, as familias só teñen que cubrir e asinar o correspondente impreso de solicitude (que poden descargar da web do Concello) e achegar a documentación precisa para acreditar calquera dos criterios establecidos para valorar as solicitudes. Máis información na Concellería de Igualdade: 981 820 494 ou 689 126 385.
Lousame Concilia é un programa de conciliación familiar organizado polo Concello de Lousame e co-financiado pola Consellería de Política Social e Igualdade e o Ministerio de Igualdade a través do Plan Corresponsables.



