
Noia celebrou onte un multitudinario magosto na Alameda, malia a chuvia e as inclemencias do tempo, que, con todo, deron unha pequena pausa para permitir a celebración gastronómica, que incluíu degustación de castañas, música e xogos tradicionais. O magosto popular de Noia celebrouse baixo carpa e contou, como dixemos, cunha nutrida afluencia de veciños e visitantes.
Dende o Concello agradeceron a implicación de todas as persoas que se achegaron a desfrutar da festa e o traballo das ANPAs dos colexios da Barquiña e Bergondo, de Xoaniña Animación e da agrupación Jaitas Blues por poñerlle música e alegría á tarde.

Pola mañá celebráronse tamén as Xornadas Micolóxicas de Noia, que tamén foron un éxito de participación a pesar do temporal que varreu a comarca ao mediodía.
A xornada comezou cunha charla teórica a cargo do biólogo Xosé Lois Piñeiro e, por sorte, o tempo acompañou un anaco e as persoas participantes puideron saír ao monte para poñer en práctica o aprendido, identificar distintas especies e descubrir a riqueza micolóxica da nosa contorna.
Para rematar, desfrutaron dunha demostración (showcooking) na Casa da Agra da man do cociñeiro Marcos Arufe, que amosou algunhas das posibilidades gastronómicas dos cogomelos.
Desde o Concello de Noia agradeceron a Xosé Lois Piñeiro e a Marcos Arufe a súa colaboración e implicación nesta actividade, así como a todas as persoas que participaron e fixeron posíbel o éxito desta segunda edición.




