O Concello de Santiago de Compostela tributou este sábado unha homenaxe ao xornalista, escritor e político Alfredo Vicenti Rey con motivo do 110 aniversario do seu pasamento. O acto central consistiu no descubrimento dunha placa conmemorativa no inmoble onde naceu, situado no número 13 da rúa da Virxe da Cerca.
A cerimonia, aberta á veciñanza, contou coa presenza da alcaldesa de Santiago, Goretti Sanmartín, acompañada por outros membros da corporación municipal. No encontro tamén participaron a presidenta da Asociación de Xornalistas de Santiago, Xulia Campo, e o presidente do Ateneo de Santiago, Francisco Candela, quen debullaron a traxectoria e o legado histórico do homenaxeado.
Durante a súa intervención, Goretti Sanmartín subliñou que a biografía de Vicenti permite percorrer «a Compostela do seu tempo», á que definiu como a súa «berce informativo, sentimental, político e vital». A rexedora lembrou ademais que o xornalista continuou a exercer de «embaixador de Galicia en Madrid» despois de marchar da capital galega polas súas discrepancias coa curia eclesiástica da época.
Un pioneiro do xornalismo e referente republicano
Nacido en Santiago en 1850 e finado en Madrid en 1916, Alfredo Vicenti é considerado unha figura sobranceira do xornalismo galego e un dos pioneiros da profesión en Compostela. Deu os seus primeiros pasos moi novo en El Diario de Santiago, cabeceira que chegou a dirixir en 1878, e colaborou en publicacións como La Gaceta de Galicia, El Heraldo Gallego e La Ilustración Gallega y Asturiana, á que se incorporou da man de Manuel Murguía.
En 1880 trasladouse a Madrid para integrarse na redacción de El Globo, dirixido por Emilio Castelar, traballando máis tarde en El Liberal. En 1907 asumiu a dirección da Sociedad Editorial de España. Recoñecido como «mestre de mestres», tivo un papel determinante no asociacionismo e na dignificación do oficio: foi fundador da Asociación da Prensa de Madrid e un dos primeiros en defender a creación dunha carreira profesional para os xornalistas.
No ámbito político, estivo vencellado ao republicanismo federal e exerceu como deputado polas circunscricións de Santa Cruz de Tenerife (1911-1914) e Ordes (1914-1918). Como escritor, publicou títulos como Recuerdos 1868-1875, Orillas del Ulla e Las dos aceras del estrecho de Gibraltar.
Este tributo coincide tamén co 175 aniversario do seu nacemento, conmemorado pola cidade ao longo deste ano, e súmase a iniciativas que manteñen viva a súa memoria, entre as que destaca o Premio de Xornalismo Cívico Alfredo Vicenti, promovido desde hai sete anos polo Ateneo de Santiago para recoñecer traballos de carácter cívico e social.
