A Piscina Municipal de Noia reabriu este mércores tras completar diferentes actuacións de renovación e mantemento que supuxeron un investimento de 61.500 euros. Os traballos permitiron mellorar o sistema de tratamento da auga, resolver filtracións no vaso e renovar diferentes elementos das instalacións, ademais de substituír o intercambiador de calor, cuxo deterioro obrigou a atrasar a reapertura inicialmente prevista, segundo informou o Concello.
Dende o Consistorio lembran que a actuación de maior importe foi a renovación do sistema de cloración automática e dos filtros da auga, cun investimento de 40.000 euros, executado pola empresa adxudicataria Lincold Ibérica, SL. “Trátase dunha intervención fundamental para o funcionamento da piscina, aínda que boa parte dos novos equipos se atopan nas instalacións técnicas e non son visibles para as persoas usuarias”, engadiu o Concello, apuntando que a “estes traballos sumouse a impermeabilización do vaso da piscina, cun investimento de 4.000 euros para corrixir as filtracións existentes, así como outros 7.500 euros en diferentes reparacións e na renovación da tarima da aula de actividades”.
Durante o peche tamén se realizaron actuacións nos vestiarios, reparouse o falso teito e puxéronse a punto a sauna e o baño turco.
Na posta a punto das instalacións participaron as empresas locais Impermiñortos e Pinturas López, ademais do persoal de mantemento e dos traballadores e traballadoras da piscina.
A estas actuacións engadiuse finalmente a substitución do intercambiador de calor, realizada por Electricidade ROT cun investimento de 10.000 euros. Segundo o Concello, “o equipo atopábase gravemente deteriorado e o atraso na chegada da nova peza impediu que a piscina puidese reabrir na data inicialmente prevista”.
O alcalde de Noia, Francisco Pérez Caamaño, destacou que “este investimento responde á necesidade de seguir coidando e mellorando un servizo municipal que utilizan persoas de todas as idades. Hai actuacións que as persoas usuarias poden ver desde o primeiro día e outras que quedan nas instalacións técnicas, pero todas son necesarias para ter unha piscina en boas condicións e garantir o seu funcionamento”.
Pola súa parte, o concelleiro responsábel da Piscina Municipal, Manolo Seijas, destacou o esforzo realizado tanto na mellora das instalacións como na xestión do servizo: “Estamos facendo dúas cousas ao mesmo tempo: mellorar unhas instalacións que necesitaban investimento e mellorar a xestión da piscina. Partíamos dun déficit de máis de 130.000 euros e hoxe estamos moi preto do equilibrio, cun cento de abonados máis e cun aforro importante na xestión. E, ao mesmo tempo, fomos capaces de investir 61.500 euros en actuacións que eran necesarias para a piscina”.
Seijas incidiu tamén na importancia das actuacións que non resultan visíbeis para as persoas usuarias: “Só no sistema de cloración automática e nos filtros investimos 40.000 euros. Son cousas que non se ven cando entras pola porta, pero que son fundamentais para que a piscina funcione correctamente. O mesmo acontece co intercambiador de calor, que estaba moi deteriorado e tivemos que substituír cun investimento adicional de 10.000 euros”.
O concelleiro agradeceu ademais “a implicación das empresas que realizaron os traballos, do persoal de mantemento e de todos os traballadores e traballadoras da piscina”, así como a paciencia das persoas usuarias. E engadiu: “Sabemos que o atraso na reapertura causou molestias e queremos pedir desculpas. Dependiamos da chegada dunha peza imprescindíbel para poder abrir a instalación en condicións e agradecemos a comprensión das persoas usuarias”.
Dun déficit de máis de 130.000 euros a preto do equilibrio
Sinalaron tamén que “a reapertura prodúcese nun momento de mellora significativa da situación económica da Piscina Municipal”. De feito, “no último ano o Concello acadou un aforro de arredor de 40.000 euros na xestión do persoal, ao tempo que o número de abonados aumentou en aproximadamente cen persoas, contribuíndo tamén ao incremento dos ingresos”, informaron Pérez e Seijas, apuntando que segundo o balance municipal “esta evolución permitiu pasar dun déficit superior aos 130.000 euros a situar o servizo actualmente moi preto do equilibrio financeiro”.
Manolo Seijas concluíu explicando que “viñamos dunha situación económica moi complicada e estamos conseguindo darlle a volta. A piscina ten máis abonados, reducimos gastos e estamos moi preto de equilibrar as contas sen deixar de investir nas instalacións. Ese é o camiño que queremos seguir: xestionar mellor para poder ofrecer tamén un servizo mellor”.
Pola súa banda, Francisco Pérez sinalou que o obxectivo do Goberno municipal é “consolidar esta recuperación, garantir a viabilidade dun servizo público importante para Noia e continuar acometendo as melloras que as instalacións necesitan”.
