É evidente que a sociedade actual está creada á medida dos trepas, insolidarios, narcisistas, xenófobos e xente sen escrúpulos. Teñen todas as condicións e facultades para progresar, enriquecerse e explotar ao resto de mortais. Aprovéitanse da humildade, as carencias económicas, a miseria e a vulnerabilidade de moitas persoas que non teñen a forza suficiente para enfrontarse a eses atropelos sistemáticos.
Os migrantes, que se chegan en patera, en busca dunha vida mellor, son uns inimigos da patria; se atopan un traballo axeitado e ben remunerado incorren en competencia cos nativos do lugar; se os seus fillos poden chegar á Universidade, son uns aproveitados do sistema; se acoden á sanidade pública aprovéitanse da sociedade do benestar. En definitiva, para algunha xentuza os seus únicos dereitos son a escravitude e a miseria.
Os vulnerables, para algúns deses trepas e insolidarios, non terían dereito nin a percibir o Salario Mínimo Interprofesional, nin o Ingreso Mínimo Vital, nin ás Pensións Non Contributivas, nin ao Subsidio por Desemprego, nin ao Bono Social ao Alugueiro, nin ao Bono Eléctrico, en definitiva a ningunha axuda ou prestación pública. Agora si, eles con total liberdade e impunidade poden especular coa vivenda, levarse o diñeiro ao estranxeiro, crear sociedades opacas (offshore), explotar aos traballadores, abusar das mulleres vulnerables… .
