O Concello do Porto do Son aprobou este martes 15 de setembro en sesión plenaria extraordinaria o POS+adicional 2/2026 da Deputación da Coruña, destinado a mellorar a rede viaria e de saneamento municipal. O acordo contou con luz verde cos votos a favor Partido Popular, abstención do Bloque Nacionalista Galego e ausencia do Partido Socialista.
Este plan provincial, que conta cun investimento total de 702.902 euros distribúese en cinco proxectos que supoñen unha mellora significativa en diferentes puntos do municipio.
Así, o plan de actuacións recolle a 2ª fase de humanización do núcleo de A Silva, na parroquia de Goiáns, que conta cun investimento de 226.123 euros; o saneamento do lugar de Pedra de Lobo e conexión á rede existente en Resúa, na parroquia de Nebra, cun investimento de 43.067 euros; a mellora da capa de rodadura do camiño municipal na parroquia de Xuño, cun investimento de 146.426 euros; a mellora da capa de rodadura no núcleo de A Tarela, na parroquia de Noal, por valor de 75.920 euros; e a mellora da capa de rodadura no núcleo de Tarrio, na parroquia de Queiruga, cun investimento de 211.365 euros.
Este compendio de actuacións, financiando con fondos provinciais, contribúe ao desenvolvemento equilibrado de todas as parroquias e reforza o compromiso do grupo de goberno cunha xestión próxima, eficaz e orientada ao interese xeral.
Tras o anuncio, o alcalde de Porto do Son, Luis Oujo, destacou que “este plan de obras dará continuidade á mellora da rede viaria e do saneamento do noso municipio e supoñerá un paso importante para levar a cabo obras e actuacións necesarias” e engadiu que “son actuacións que reforzan o compromiso deste Goberno local coa mellora das infraestruturas municipais e que apostan por unha xestión eficaz, co obxectivo de mellorar a calidade de vida da veciñanza”.
