A V Xornada de Pesca de Ribeira, organizada pola OPP83 Sociedade Cooperativa Galega do Mar Santa Uxía (Sociedad Cooperativa Gallega del Mar Santa Eugenia), reunirá o vindeiro venres 11 de setembro a representantes das administracións e expertos do sector pesqueiro para analizar os retos que marcarán o próximo fondo marítimo-pesqueiro
Segundo informaron dende a cooperativa OPP83, a inscrición xa está aberta para participar nunha cita que terá lugar na Escola Oficial Náutico-Pesqueira de Ribeira e na que se porá o foco nalgunhas das decisións e retos que marcarán o futuro inmediato da actividade pesqueira.
Baixo o título Claves para abordar a pesca no próximo fondo marítimo-pesqueiro, a xornada reunirá a responsábeis de distintas administracións e expertos para analizar cuestións de especial interese para a sector, desde o novo escenario que se abre tralo FEMPA ata as posibilidades de modernización da frota e a xestión das capacidades dispoñíbeis para os buques pesqueiros.
A xornada arrancará ás 9.30 horas coa participación da xerente da OPP83, María José Casais; o director da Escola Oficial Náutico-Pesqueira de Ribeira, Juan Domingo Cambeiro; a conselleira do Mar da Xunta de Galicia, Marta Villaverde; e a alcaldesa de Ribeira, María José Sampedro.
Entre os principais contidos do programa destaca a mesa dedicada ao novo escenario posFEMPA, na que intervirán o director xeral de Pesca, Acuicultura e Innovación Tecnolóxica da Consellería do Mar, Isaac Rosón; e o subdirector general de Sostenibilidad Económica y Asuntos Sociales do MAPA, Manuel Pablos.
O programa tamén abordará o futuro da modernización da frota da man de Manuel Pablos e falarase das posibilidades de cesión de capacidade dispoñíbel a buques de pesca, contándose ademais coa participación da directora general de Marina Mercante, Ana Núñez. A xestión técnica desas capacidades centrará outro dos relatorios, que contará coas intervencións do director de Bureau Veritas España Norte, Ricardo Iparraguirre, e o director xeral de VICUSdt, Adrián Sarasquete.
A xornada, que conta con financiamento da Xunta de Galicia e o FEMPA no marco do PPeC 2026 da Organización de Produtores Pesqueiros de Ribeira, será clausurada por María José Casais e finalizará cunha degustación de produtos pesqueiros prevista para as 13.45 horas.
As persoas interesadas en asistir a V Xornada de Pesca de Ribeira poden formalizar a súa inscrición en liña.
A participación está aberta ata completar aforo.
