As obras na autovía do Barbanza obrigan a cortar o último tramo da AG-11 este mércores e xoves
Os traballos de reforzo de firme na autovía do Barbanza farán preciso pechar ao tráfico os dous sentidos de circulación no tramo final da AG-11 desde este mércores día 9 ata última hora do xoves día 10, concretamente entre o enlace de Palmeira no quilómetro 38 e o enlace final de Ribeira no quilómetro 40.
A causa desta restrición polos labores de estendido de aglomerado, os vehículos que viaxen en dirección Ribeira cara a Padrón terán que incorporarse á vía rápida no enlace de Palmeira, punto polo cal tamén deberán abandonar a autovía de xeito obrigatorio as persoas usuarias que circulen procedentes de Padrón
De forma paralela ás tarefas de asfaltado, as labores de repintado da calzada obrigarán a deixar operativo unicamente un carril por sentido ao longo de toda a semana no treito comprendido entre os quilómetros 32 e 38
Esta intervención da Xunta de Galicia abrangue a totalidade dos máis de 40 quilómetros do trazado da autovía cun orzamento superior aos 10,5 millóns de euros, partida que inclúe a reparación integral da capa de rodaxe en tronco e enlaces, a substitución da sinalización horizontal, a colocación de novo balizamento e a renovación das xuntas de dilatación nas estruturas da vía para incrementar a seguridade viaria.
