O Concello de Noia vén de adxudicar á empresa local Futuranea a obra de mellora da eficiencia enerxética da iluminación pública do Parque Empresarial de Augalevada, cun investimento de 31.000 euros.
Segundo informou o Concello, a intervención “permitirá renovar a iluminación dunha zona que presentaba importantes deficiencias e precisaba unha modernización”.
Dende o Consistorio engadiron que a instalación actual conta con luminarias dunha xeración anterior, cun maior consumo e sen sistemas de regulación nocturna, ademais de presentar tramos de cableado en mal estado e un cadro de mando que necesita ser renovado.
En concreto, substituiranse 40 puntos de luz por novas luminarias LED de alta eficiencia, pasando de 120 W a 80 W por luminaria. Tamén se renovarán os tramos de cableado deteriorados e instalarase un novo cadro de mando eléctrico, reforzando a seguridade e a fiabilidade da instalación.
O Concello salientou que a renovación permitirá ofrecer unha mellor iluminación no parque empresarial e reducir o consumo eléctrico preto dun 43 %. A estimación anual pasará dos 20.160 aos 11.520 kWh, o que supón un aforro de 8.640 kWh e preto de 2.000 euros cada ano.
A obra conta con financiamento da Xunta de Galicia, dentro do programa de axudas para a habilitación e mellora das infraestruturas dos parques empresariais, na liña destinada á eficiencia enerxética da iluminación pública.
O alcalde, Fran Pérez, explicou que “esta actuación permitirá mellorar de maneira importante a iluminación de Augalevada e as condicións do noso parque empresarial. Falamos dunha zona que necesitaba unha renovación e na que imos conseguir unha iluminación máis eficiente, segura e adaptada ás necesidades actuais”.
Pola súa banda, o tenente de alcalde e responsábel da área económica, Manolo Seijas, destacou que “son 31.000 euros de investimento para actuar de maneira integral sobre a iluminación do polígono. Non só cambiamos 40 luminarias, senón que renovamos o cableado e o cadro eléctrico, melloramos a iluminación da zona e conseguiremos un aforro próximo aos 2.000 euros cada ano”.
