Medra, e de que maneira, a actividade represiva dos grupos e partidos “ultra” que evidencia que aínda que morreran Joseph Goebbels, Adolf Hitler, Benito Mussolini e Francisco Franco, a doutrina destes – nazismo, franquismo, fascismo e tódolos “ismos” que se queiran engadir- segue viva, continúan vivos, convertidos en agresores contra todo o que poida representar “ser distinto”. Desde un grupo de cantareiras a uns migrantes. En terras de migración.
Desta vez, empregando como xustificación a “invasión” de Ceuta, os teoricamente menos prexudicados na España franquista polas esquerdas – nomeadamente xoves e maiores (relativos) que pola súa aparente idade só coñeceron de lonxe o franquismo e os seus efectos- cargaron desaforadamente contra reporteiros de TVE e la Sexta polas informacións que ambas cadeas de televisión ofrecen cando tratan da actividade política española. Proliferaron os insultos especialmente en Madrid onde, amais, varios xornalistas dos citados medios chegaron a ser agredidos diante da Policía Nacional, que se limitou a, simplemente, separar a algúns agresores. Sen máis.
Co doado que resulta cambiar de sintonía cando na televisión hai algo que non nos agrada!. Mais o sorprendente foi comprobar como homes e mulleres atacaban covardemente aos reporteiros e, de xeito especial, ás reporteiras (insultos que en moitos casos partían de mulleres que, polo que aparentaban, non baixaban dos 50 anos) e que se dirixían ás xornalistas cualificándoas de rameras ao tempo que cantaban o “Cara ao sol”, aprendido após a morte de Franco. Outro tanto acontecía con homes cuxa idade seguramente roldaría os 70-80 anos.
E por se fose pouco o sinalado, algo semellante ocorreu na Praza Maior de Palencia, onde “Tanxugueiras”, o grupo galego aplaudido polos televidentes españois nas súas distintas actuacións, foron increpadas por un grupo de manifestantes a prol de Ceuta, obrigándoas a retrasar a súa intervención case unha hora. Eran galegas, non “españolas”. Que cousas!.
Que é o que motiva esta especie de explosións verbais e físicas protagonizadas inicialmente por “ultras” que non deben ter outra cousa que facer?.
Disque é a polarización. Disque.
