A Confraría de Pescadores Virxe do Carme de Rianxo celebrou este venres, 11 de setembro, o acto de reapertura do seu antigo local, un histórico inmóbel situado no Paseo da Ribeira, traos traballos de rehabilitación realizados no edificio.
O evento, que contou coa participación de representantes do sector e persoas vinculadas á actividade marítima de Rianxo, deu comezo cun breve discurso de Miguel Ángel Iglesias, patrón maior da Confraría de Pescadores Virxe do Carme de Rianxo, no que destacou a importancia que tivera o local e explicou como o seu acondicionamento supoñerá contar cun novo espazo para formación.
Tras el, tomou a palabra Ángeles Vázquez Suárez, directora xeral de Desenvolvemento Pesqueiro, quen destacou que o local “non é só un edificio, é a memoria viva da Confraría de Pescadores Virxe do Carme e o testemuño de xeracións de mariñeiros, mariscadoras e familias enteiras que fixeron do mar o seu sustento”.
A continuación, presentouse a exposición instalada no local, que recolle diferentes momentos da traxectoria da Confraría e do asociacionismo pesqueiro de Rianxo. Para clausurar o acto, ofreceuse aos asistentes un viño galego, no que puideron gozar dunha degustación de produtos do mar e gastronomía local.
A rehabilitación deste histórico local enmárcase dentro da campaña O valor do mar non é só o que se ve, no proxecto Memoria de Mar, unha iniciativa co-financiada pola Unión Europea, a Xunta de Galicia e o GALP Ría de Arousa.
A reapertura supón recuperar un inmóbel cun importante valor histórico para a Confraría e para o sector pesqueiro de Rianxo. Este local, desde a súa adquisición en 1925 polo entón Depósito de Pescadores, estivo ligado á evolución da actividade asociativa mariñeira da localidade e ao nacemento da actual Confraría de Pescadores Virxe do Carme de Rianxo.
Tras a súa rehabilitación, o edificio marítimo recupera agora o seu vínculo coa actividade da Confraría e do sector pesqueiro, acollendo reunións, encontros e actividades de profesionais e asociacións relacionadas co ámbito marítimo-pesqueiro.
Ademais, o local manterá a exposición dedicada á historia da entidade.
