O Concello de Outes achega co comezo de setembro e o inicio do curso unha nova edición do programa de rutas Coñece o noso patrimonio. Trátase dun ciclo de itinerarios culturais para desvelar, este outono, os tesouros ambientais, paisaxísticos e patrimoniais de Outes.
Coma nas edicións anteriores, as inscricións, que son obrigatorias, abriranse o luns previo a cada andaina e para inscribirse hai que cubrir o formulario que atoparemos escaneando o código QR do cartel ou na páxina web municipal.
O programa comeza o 6 de setembro co roteiro Paseo mar e monte en San Cosme, de 9 quilómetros de percorrido e con saída da Igrexa de San Cosme de Outeiro.
A axenda prosegue o 20 de setembro con De San Tirso á catedral da electricidade, con saída da Igrexa de San Tirso e con 8 quilómetros de distancia.
A terceira ruta será o 4 de outubro e trátase de Visita ás capelas e Castro de Santo Ourente, con saída da Igrexa de Santo Ourente e cunha distancia de 8 quilómetros.
O 25 de outubro celebrarase o roteiro A Santa Lucía por Entíns, con saída da Igrexa de Entíns e con 6,5 quilómetros de percorrido.
