O Concello de Rois celebrará o sábado 12 de setembro o XXI Día da Bici, unha cita deportiva e de convivencia aberta á participación da veciñanza.
A marcha comezará ás 17.00 horas desde o Polideportivo Municipal, que tamén será o punto de chegada. As persoas participantes completarán un percorrido de 11 quilómetros por diferentes lugares do municipio.
A ruta partirá do Polideportivo de Rois e continuará pola A Pontenova, A Peruca, A Meana, Seaxe, de novo A Meana e Lamego. Na praia fluvial habilitarase un punto de avituallamento antes de iniciar o regreso por Seira, Oín e A Antequeira ata finalizar no polideportivo.
A participación será gratuíta e as inscricións poderán realizarse o propio día da marcha, entre as 15.45 e as 16.45 horas, no pavillón polideportivo. O Concello lembra que é obrigatorio utilizar casco durante todo o percorrido.
Antes da saída celebrarase no polideportivo unha xincana ciclista dirixida aos máis pequenos e, ao rematar a ruta, realizarase un sorteo de agasallos, entre os que se inclúe unha bicicleta. Tamén se entregarán recoñecementos ás persoas ciclistas de maior e menor idade que participen na marcha.
O Día da Bici está organizado polo Concello de Rois coa colaboración da Deputación da Coruña, o Club Ciclista Padronés Cortizo, Froiz, Gadis, o Restaurante Pedra Santa, AdeMario e Protección Civil de Rois e de Padrón.
Para solicitar máis información, as persoas interesadas poden contactar co departamento municipal de Deportes a través do correo electrónico deportes@rois.gal ou no teléfono 981 816 061.
