A deportista local, que compaxina a súa carreira militar e de enxeñaría co deporte de alto nivel, suma este ano o título mundial de Vaurien e a prata na Copa do Rei.
A alcaldesa de Ribeira, María Sampedro, e o concelleiro de Deportes, Álex Vidal, recibiron oficialmente no consistorio á regatista local Alejandra Vicens para trasladarlle a felicitación de todo o municipio pola súa extraordinaria tempada deportiva. No que vai de 2026, a deportista suma xa un total de nove éxitos de primeiro nivel ao seu palmarés.
Entre os fitos acadados este ano pola ribeirense destacan:
- Ouro no Campionato do Mundo de Vaurien (Travemünde).
- Ouro no Campionato de España de Vaurien (As Pontes) e ouro na Copa de España de Vaurien (Barrios de Luna).
- Prata na prestixiosa Copa do Rei e ouro no Trofeo Conde de Godó (Barcelona), ambos a bordo do TP52 Hispania.
- Bronce no Trofeo SM La Reina (Valencia) a bordo do TP52 Hispania, e segunda posición na PalmaVela a bordo do TP52 AIFOS.
- Bronce no Campionato Nacional Militar de Vela (Marín), xunto coa clasificación para o Campionato do Mundo Militar e os Xogos Olímpicos Militares.
Unha traxectoria de éxito e disciplina
O vínculo de Vicens coa vela vén de lonxe. Na súa etapa formativa destacou nas clases Optimist e Snipe, acadando títulos galegos e a prata no Campionato do Mundo de Vaurien en Roma (2025).
A regatista compaxina o deporte de alta competición cunha destacada carreira profesional no ámbito militar e tecnolóxico. Ingresou con 18 anos na Escola de Técnicas de Seguridade, Defensa e Apoio do Exército do Aire (Zaragoza) como soldado especialista en Protección e Apoio á Forza. Na actualidade, exerce como Xefa da Oficina de Relacións Institucionais do Mando Conxunto do Ciberespazo do Estado Maior da Defensa, contando ademais cun grao en Enxeñaría Informática e diversas titulacións superiores en redes, telecomunicacións e ciberseguridade.
