Prisión sen fianza para os tres detidos con 1.400 quilos de cocaína na Pobra do Caramiñal
A Policía atribúe aos Fanchos a descarga e a custodia da cocaína comisada na Pobra
O líder dese grupo, Rafael R. G., é primo do Chicle, o asasino de Diana Quer
O xulgado de Ribeira decretou o ingreso en prisión provisional, comunicada e sen fianza para os tres homes detidos o pasado sábado na Pobra do Caramiñal tras a incautación de 1.410 quilos de cocaína. A todos eles impútaselles un presunto delito contra a saúde pública.
Entre os encarcerados atópase Rafael R. G., considerado o xefe dos Fanchos, un clan familiar vencellado ao tráfico de estupefacientes na comarca do Barbanza, con especial actividade en Boiro e A Pobra. Dáse a circunstancia de que o líder deste grupo é primo de JEAG, alcumado o Chicle e autor do asasinato de Diana Quer en 2016; o arresto produciuse xusto o día no que se cumprían dez anos da desaparición da moza madrileña.
A operación policial, desenvolvida en estreita colaboración coa axencia antidroga estadounidense (DEA), iniciouse o xoves anterior, cando os axentes tiveron constancia de que dúas embarcacións descargaran unha importante partida de droga nun areal da localidade. As pescudas situaron de inmediato ao clan dos Fanchos na loxística de recepción e custodia do cargamento.
Tras un primeiro movemento sospeitoso o venres de madrugada —no que un vehículo recolleu a unha persoa con mochilas baixo estritas medidas de seguridade—, o operativo culminou na madrugada do sábado. Os axentes interceptaron ao xefe do clan xunto a outros dous individuos cando trasladaban vultos pesados desde un alpendre próximo á praia do Conchido cara a outro inmoble do municipio.
Ademais dos 1.410 quilos de cocaína, os axentes comisaron 100 gramos de heroína, diñeiro en efectivo e diverso material relevante para a causa.
