Co remate do mes de xullo pechou en Noia a primeira edición de Somos Comunidade, o primeiro campamento de voluntariado do Concello (área de Servizos Sociais), que incluíu un completo programa de actividades solidarias e de acción social, de coidados (sociais, medioambientais) e de acompañamento.
O Concello agradeceu a implicación desinteresada das mozas e mozos participantes e tamén o labor despregado polas entidades Cruz Vermella Noia, Arca de Noia, Cáritas Noia, A Creba e A Misela, que abriron as portas das súas respectivas sedes para amosar o seu día a día aos rapaces e rapazas do programa de voluntariado.
O programa de voluntariado de verán do Concello de Noia deste verán consistiu na primeira edición de Somos Comunidade, un campamento xuvenil de participación social. A iniciativa permitiu aos mozos e mozas coñecer de preto e colaborar no día a día de entidades sociais locais da vila.
Os obxectivos foron achegar a realidade social e inclusiva da contorna á mocidade; fomentar valores de solidariedade, apoio mutuo e convivencia; e implicar os participantes en tarefas cotiás de coidado e acompañamento comunitario.
No programa de voluntariado Somos Comunidade do Concello de Noia participaron preto dunha vintena de rapazas e rapaces.
Os mozos e mozas participantes tiñan idades comprendidas entre os 12 e os 17 anos e dividíronse en dúas quendas consecutivas ao longo de todo o mes de xullo.
