O Grupo Municipal Socialista de Rianxo, a través do seu voceiro Óscar Rial, emitiu un comunicado no que denuncia o estado de conservación da escola unitaria da Bacariza, en Isorna, un espazo que segundo lembra a agrupación “lonxe de estar pechado ou sen uso, é utilizado diariamente pola veciñanza, con máis de dez persoas reuníndose decote para xogar ás cartas”. Segundo sinalan no comunicado, o estado no que se atopa o inmóbel é “moi preocupante”, en parte porque o acceso a este espazo realízase precisamente pola zona na que se poden observar importantes sinais de deterioro e desprendementos no teito.
Ademais, indican, “no interior tamén son visíbeis humidades, manchas de mofo e deterioración do teito e das paredes, nunha situación que require unha actuación inmediata”, sinalan, engadindo que “non estamos falando dun espazo abandonado sen uso, estamos falando dun lugar ao que acode a veciñanza todos os días e ao que se está accedendo por unha zona que presenta un risco evidente”.
Desde o PSOE consideran “especialmente grave” que, ante esta situación, o Concello non teña executado unha actuación de reparación, nin establecido medidas preventivas, nin limitado o acceso á zona afectada para garantir a seguridade das persoas.
Os socialistas reclaman ao Goberno municipal que inspeccione o estado do inmóbel e “adopte de inmediato todas as medidas necesarias para evitar calquera accidente, ademais de programar a reparación das deficiencias existentes”.
“A veciñanza de Rianxo merece poder desfrutar de espazos públicos dignos, seguros e en condicións. A prioridade dun Goberno municipal debería ser protexer ás persoas e manter os equipamentos públicos, non deixar que os problemas se acumulen ata converterse en riscos”, sinalan.
