O Concello de Boiro convoca un proceso selectivo para a contratación do persoal docente e directivo que impartirá o programa de formación e emprego Talento Mozo denominado “Xuventude II” na especialidade de mantemento de xardíns e zonas verdes. Vaise seleccionar un/ha director/a, un/ha titor/a e un/ha mestre/a.
Os requisitos para formar parte deste proceso selectivo serán os comúns para o acceso ao emprego público relativos á nacionalidade, capacidade funcional, habilitación e compatibilidade. Ademais, haberá uns requisitos específicos para cada un dos postos: no caso do director a titulación de grao; o docente deberá estar en posesión do título de grao e dispoñer do certificado profesional de habilitación para a docencia; no caso do titor/a deberá ter a titulación de licenciatura ou grao en pedagoxía, psicopedagoxía ou psicoloxía.
O programa terá unha duración de 12 meses e formaranse 16 persoas mozas maiores de 18 anos e inscritos no Sistema Nacional de Garantía Xuvenil, recibirán formación teórica e tamén práctica en xardíns e zonas verdes dos municipios de Boiro, Rianxo e A Pobra.
O programa de formación e emprego Talento Mozo “Xuventude II” dos Concellos de Boiro, Rianxo e A Pobra está financiado pola Consellería de Emprego, Comercio e Emigración mediante unha subvención de 478.994,36 euros.
As bases e toda a información sobre o proceso selectivo do persoal docente e directivo están a disposición das persoas interesadas na web municipal. O prazo de presentación de solicitudes é de 5 días hábiles e remata o 14/08/2026.
