A Plataforma en Defensa da Sanidade Pública do Barbanza anunciou novas mobilizacións neste remate de agosto. Para comezar, este último xoves a veciñanza concentrarase ás 12.00 do mediodía no Centro de Saúde de Ribeira. O motivo é poñer de manifesto que neste intre hai dúas prazas de medicina de familia e unha de enfermería que non teñen titular, “ademais de todas as ausencias por vacacións”, agravadas polo feito de contar Ribeira e o seu concello con moita máis poboación demandante de servizos sanitarios, por tratarse de tempada de vacacións e de afluencia de turistas.
Ademais, este venres 28 de agosto volverán concentrarse diante do Centro de Saúde de Aguiño ás 11:30 horas. A plataforma recorda que “nesta época estival, co aumento de poboación, a baixa de longa duración do Centro de Saúde de Aguiño (de mais de 9 meses) dunha das 2 médicas de familia cubriuse cun día de tarde de 4 horas xerando importantes atrasos nas citas”.
Un pouco máis tarde, ás 12.00 horas, haberá outra concentración diante do Centro de Saúde da Pobra co obxectivo de reclamar a apertura do PAC en horario de tarde, e a cobertura das ausencias do persoal.
O martes que vén, 1 de setembro, primeiro martes de mes, a plataforma volve ás 20:00 diante do Centro de Saúde de Rianxo, por “un PAC a tempo completo en Rianxo”.
