O Concello de Outes, a través do Servizo de Normalización Lingüística, vai organizar esta fin de semana a nova edición (a sétima) da Feiriña, un encontro para reivindicar as relacións veciñais e comerciais tradicionais, a creatividade local (e galega) e a dinamización social baseada na comunicación e na participación.
A Feiriña celebrarase novamente no centro da Serra de Outes os días 15 e 16 de agosto.
Haberá comercios tradicionais, postos de artesanía e de produtos do agro, polbeira, concertos, actividades de animación infantil para a rapazada (con inchábeis e obradoiros de artesanía infantís), establecementos hostaleiros a pé de rúa e xeados.
A Feiriña é a gran feira do comercio local, o agro e a artesanía do municipio.
En edicións anteriores superáronse os 60 postos de venda a disposición de veciños e visitantes, principalmente na rúa da Capela, e todo indica a que este ano alcanzarase a dita cifra ou mesmo superarase.
