Á instancia xudicial, a Policía deberá informar sobre se a chegada a Ceuta de milleiros de persoas -marroquís e subsaharianas- foi orquestrada. A Audiencia Nacional, por iniciativa da titular do Xulgado Central de Instrcción, abre unha investigación por esa entrada masiva en Ceuta, caso que podería ter consecuencias penais para funcionarios e autoridades estranxeiras, desencadeando sancións penais e unha crise diplomática con Marrocos, xa que logo afecta directamente á seguridade nacional e á política migratoria.
Quere saber a Audiencia Nacional se as avalanchas migratorias en Ceuta foron un ataque organizado (por boca de Santiago Abascal, unha invasión).
A xuíza María Tardón quere determinar se a entrada masiva de ducias de milleiros de persoas os pasados días 30 e 31 de xullo resposta a unha “acción concertada” desde Marrocos e pon a lupa sobre un episodio que rebordou as costuras da cidade autónoma e que agora pode ter consecuencias penais após a denuncia de Iustitia Europa, organización que acusa a funcionarios, integrantes de organizacións criminais e autoridades tanto españolas coma estranxeiras.
Aínda que non hai imputados concretos, semella que a atención está centrada en Marrocos. De feito, a xuíza quere que a Comisaría Central de Estranxeiría e Fronteiras detalle o número de axentes despregados, que protocolos foron activados e se existiu pasividade ou connivencia.
En definitiva, o auto da Audiencia Nacional procura indicios de que a avalancha foi dirixida premeditamente, por exemplo abrindo as portas adrede ou aproveitando un aparente relaxo dos controis marroquís. Unha investigación baseada en posibles delitos contra a integridade territorial e contra dos dereitos dos cidadáns estranxeiros que poderían desencadear ordes de detención contra responsábeis marroquís, escenario que tensaría aínda máis as xa delicadas relacións con Rabat.
Será este o motivo polo que se dilatou a intervención de máis forza pública e o propio Exército obrigando así a que tamén Marrocos reactivara os seus efectivos de control fronteirizo?. Talvez se cavilara máis polos efectos desa obriga nos gobernos de Estados Unidos de América e Israel, apoios evidentes de Marrocos?.
